Thursday, October 21, 2010

വല്സലാകുമാരിയും ഇംഗ്ലീഷും

അടുക്കള പണിയൊക്കെ ഒതുക്കി വത്സലാ കുമാരി കമ്പ്യൂട്ടറിന് മുന്നില്‍ ഇരുന്നു.

ആനയുടെ വലിപ്പമുള്ള കമ്പ്യൂട്ടര്‍ ഒന്ന് മാറ്റിക്കൂടെ മനുഷ്യാ എന്ന് മനസ്സില്‍ "കാന്തനെ" തെറി വിളിച്ചും കൊണ്ട് പവര്‍ ബട്ടണ്‍ ആഞ്ഞു ഞെക്കി. എന്തിനും ലാഭം നോക്കുന്ന  പ്രിയതമന്‍ മേടിച്ച ആ സെക്കന്റ്‌ ഹാന്‍ഡ്‌ പിസി "എന്തിനാടീ എരണം കെട്ടവളെ, എന്നെ ഓണ്‍ ചെയ്തത്" എന്ന മട്ടില്‍ ഓണ്‍ ആയി. ലോഗിന്‍ സ്ക്രീന്‍ വരാന്‍ എടുത്ത അര മണിക്കൂര്‍ ഉണ്ടായിരുന്നെങ്കില്‍ പത്തു തേങ്ങ പൊതിക്കാമായിരുന്നു എന്ന് മനസ്സില്‍ പറഞ്ഞു കൊണ്ട് ആ "ഉത്തമ" ഗൃഹ നാഥ എക്സ്പ്ലോരെരില്‍ ആഞ്ഞു അമര്‍ത്തി. 

നാശം പിടിക്കാന്‍, ഇനി ഇത് എത്രനേരം എടുക്കും ഒന്ന് തുറന്നു വരാന്‍ എന്ന് ദൈവത്തിനു അറിയാം. പോയി ഒരു ചായ കുടിച്ചു വരാം..

ഈശ്വരാ, ഇത്ര വേഗം തുറന്നോ, മഴക്കോള് കണ്ടത് വെറുതെ അല്ല.

ഏതു നേരത്താണോ ആവോ, "വത്സല മണവാളന്‍" എന്ന ഐഡി ഉണ്ടാക്കാന്‍ തോന്നിയത്.  ടൈപ്പ് ചെയ്തു വരുമ്പോഴേയ്ക്കും നെറ്റ് ഡിസ്കണക്ട്  ആകാതിരുന്നാല്‍ മതി . 

ഹാവൂ ദാ തുറന്നു "മുഖ പുസ്തകം". ആഹാ, എല്ലാരും എത്തിയിട്ടുണ്ടല്ലോ..

ഭഗവാനെ ഇവളുമാര്‍ക്കെല്ലാം ഇതെന്തു പറ്റി?  ഏഴാം ക്ലാസ്സില്‍ മൂന്നു പ്രാവശ്യം പഠിച്ച്, സ്കൂളിനോട് "യാത്രാമൊഴിയിലെ പാട്ട് പാടിയ" ചഞ്ചലാക്ഷി യും, മൃദുല കുമാരി യും ഒക്കെ ഒടുക്കത്തെ നെടു നീളന്‍ ഇംഗ്ലീഷ് വരികള്‍ എഴുതി വിട്ടിരിക്കുന്നു. എന്നിട്ട്  അവളുമാര്‍ തന്നെ "ലൈക്‌" ഞെക്കിയിരിക്കുന്നു. ഇത്രയ്ക്കും വിവരമായോ ഇവളുമാര്‍ക്ക്???  അതോ ഞാന്‍ അറിയാതെ വല്ല "തപാല്‍ മാര്‍ഗം" കോഴ്സിനും ചേര്‍ന്ന് വിവരം വച്ചോ..അതോ മീന്‍ വേടിച്ചപ്പോള്‍    കിട്ടിയ പേപ്പറില്‍ നോക്കി "അതേ പടി" പകര്‍ത്തിയതോ....

ചഞ്ചലാക്ഷി എഴുതി വിട്ട വരികളുടെ അര്‍ഥം അവളോട്‌ തന്നെ വിളിച്ചു ചോദിച്ചാലോ?

“Do all the good you can,By all the means you can,In all the ways you can,In all the places you can,At all the times you can,To all the people you can,As long as ever you can.

വേണ്ട, അവളെന്നല്ല, എന്റെ കൂടെ പഠിച്ച് തോറ്റ ഒരുത്തിയ്ക്കും അര്‍ഥം പറയാന്‍ പറ്റൂല, അത് ഉറപ്പ്. എന്തിനാ അവളെ വിഷമിപ്പിക്കുന്നത്..

ഈശ്വരാ, ഞാന്‍ മാത്രം ഒന്നും എഴുതാതിരിക്കുന്നത് ഒരു കുറവായിപോകുവോ  , ഇനി ഈ ഇംഗ്ലീഷ്  വരികളൊക്കെ എവിടെ പോയി തപ്പും ഭഗവാനെ ...

ആകെ കയ്യിലുള്ളത്, ഗുരുവായൂര്‍ പോയപ്പോള്‍ പത്തു രൂപ കൊടുത്ത് ട്രെയിനില്‍ നിന്ന് മേടിച്ച ഭക്ത വത്സലന്‍ എഴുതിയ  "പഴഞ്ചൊല്ലില്‍ പതിരില്ല" മാത്രമാ..
ഉം.. വഴിയുണ്ട്, ഇവള് മാരെ ഞെട്ടിക്കാന്‍ ഇതേ മാര്‍ഗമുള്ളൂ..

ഇതിന്റെയൊക്കെ  ഇംഗ്ലീഷ്  ഇനി കണ്ടു പിടിക്കണം.

"അടി തെറ്റിയാല്‍ ആനയും വീഴും"
"കാള കിടക്കും കയറോടും"


ദാ.. പിടിചോടീ മൃദുലാ കുമാരീ, ചഞ്ചലാക്ഷീ,, കോമള വല്ലീ നീയൊക്കെ ഞെട്ടാന്‍ കിടക്കുന്നതേ ഉള്ളൂ...

അന്ന് വൈകിട്ട് "മുഖ പുസ്തകം" തുറന്ന മൃദുലാ കുമാരീ, ചഞ്ചലാക്ഷീ,, കോമള വല്ലീ  എന്നീ കൂട്ടുകാരികള്‍ "വത്സലാ കുമാരിയുടെ" ഇംഗ്ലീഷ് പാടവം കണ്ടു ഞെട്ടി തരിച്ചു.


Miss the hit, elephant falls
Bullock lie down, rope runs
coconut falls on head of dog wants to cry,
Non-speaking cat will break pot
Don’t give stick and buy beat
Go to snake eating place, eat the centre piece
What is cat doing at Gold Melting Place
Mother has life pain, Daughter playing veena
Give Elephant Don’t give hope

No comments:

Post a Comment